Rekord yoluxma və ölüm – Ukraynada və Bolqarıstanda gərgin vəziyyət yaranııb

93

Martın 24-də Ukrayna koronovirusdan rekord ölüm, Bolqarıstan isə pandemiya başlanandan ən yüksək yoluxma aşkarlandığını bildirir. Hazırda bir sıra Avropa ölkələrində COVID-19-a yoluxmaların yeni dalğası qeydə alınır.

“AzPolitika.info” “Azadlıq radiosuna istinadən xəbər verir ki, Ukraynanın Səhiyyə naziri Maksim Stepanov son 24 saat ərzində ölkədə COVID-19-dan 342 nəfər öldüyünü bildirib. Martın 23-də bu say 333 nəfər idi. Nazir son 24 saat ərzində 14 min 174 yeni yoluxmanın aşkarlandığını bildirib. İndiyədək Ukraynada koronavirusa 1 milyon 580 minə yaxına yoluxma, 31 minə yaxın ölüm qeydə alınıb.

Bolqarıstan isə son 24 saat ərzində 4 min 851 yoluxma haqda məlumat yayıb. Bu, ölkə üçün rekord rəqəm sayılır.

7 milyon əhalisi olan bu cənub-şərqi Avropa ölkəsində pandemiya dövründə 313 minə yaxın yoluxma, 12 min 307 ölüm təsdiqlənib.

Bu arada Çində gündəlik COVID-19 vaksinləri istehsalının 5 milyon dozaya çatdığı xəbər verilir. Fevralın 1-də gündəlik istehsalın 1.5 milyon doza olduğu bildirilirdi.

“Sinxua” agentliyinin yazmasına görə, bazar ertəsi ümumilikdə 80.46 milyon doza vaksin vurulub. Şənbə gününün sonunda 74.96 milyon dozanın vurulduğu bildirilirdi. Bu, vaksinasiyanın sürətlə getdiyini göstərir. Yerli hakimiyyətin açıqlamasına görə, Şanxay artıq əcnəbi rezidentlərə də vaksinasiya təklif edəcək. Bu, qeyri-Çin vətəndaşlarına vaksin təklif edən ilk şəhər olacaq.

Britaniyada isə avqustdan uşaqlara peyvənd vurulmağa başlayacaq. Bu haqda “The Telegraph” qəzeti martın 23-də yazıb. Qəzet planlardan xəbərdar mənbələrə istinadla bunun gözlənildiyindən iki ay tez gerçəkləşəcəyini qeyd edir.

Hazırda hökumət Oksford Universitetinin uşaqların peyvəndlənməsi ilə bağlı araşdırmasının nəticələrini gözləyir. Universitet AstraZeneca Plc ilə birlikdə hazırladığı vaksini sınaqdan keçirib və uşaqlarla bağlı qərar verməzdən öncə nəticələr öyrəniləcək.